Futbollisti i Atletico Madridit, Antoine Griezmann, po mendon të tërhiqet nga kombëtarja franceze, pasi trajneri i Francës, Didier Deschamps vendosi t’i dhurojë shiritin e kapitenit Kylian Mbappe, raportojnë mediat në Paris.

Pas tërheqjes së portierit Hugo Lloris nga kombëtarja, Deschamps vendosi t’i japë kapitenin Mbappes, i cili do të drejtojë kombëtaren në eliminatoret për Kampionatin Evropian të vitit 2024.

Griezmann ishte kandidat për kapitenin e ri të “trikolorëve”, ndërsa mediat franceze kujtojnë se ëndrra e futbollistit të Atléticos ishte që me shiritin e kapitenit të priste bashkëlojtarët në kualifikueset evropiane.

Griezmann u emërua zëvendës kapiten i kombëtares franceze.

Mediat franceze kujtojnë se Griezmann është favorit në dhomat e zhveshjes, prandaj priste të ishte kapiteni i ri, pasi për kombëtaren ka luajtur 117 ndeshje dhe ka shënuar 42 gola.

Griezmann, 32-vjeçar, është tetë vjet më i madh se Mbappe, i cili luajti 66 ndeshje për Francën dhe shënoi 36 herë.